ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន មានប្រសាសន៍ថា វិធានការ ៣កុំ ៣ការពារនៅតែជាវិធានការចាំបាច់ បើទោះបីជាកាតព្វកិច្ចពាក់ម៉ាសត្រូវបានដកក៏ដោយ។

ថ្លែងនៅក្នុងកម្មវិធីបិទសន្និបាតបូកសរុបការងារឆ្នាំសិក្សា២០២០-២០២១ និងលើកទិសដៅការងារឆ្នាំសិក្សា២០២១-២០២២ សម្តេចបានឱ្យដឹងថា បើទោះបីកាតព្វកិច្ចពាក់ម៉ាសត្រូវបានដកក៏ដោយ ខ្ញុំក៏បានលើកទឹកចិត្តដដែលឱ្យពាក់ម៉ាស […] ថ្ងៃនេះតាមផ្លូវខ្ញុំសង្កេតឃើញថា បងប្អូនប្រជាពលរដ្ឋមិនតិចជាង ៦០% ទេដែលបន្តពាក់ម៉ាស។

សម្តេចបានបន្តថា បច្ចុប្បន្នយើងគ្រាន់តែឈ្នះសមរភូមិតូចៗតែប៉ុណ្ណោះយើងមិនទាន់ឈ្នះសង្រ្គាមនៅឡើយទេ (សង្រ្គាមប្រឆាំងនឹងកូវីដ-១៩) ទម្រង់កូវីដ អាហ្វា ដែលតា យើងបានយកឈ្នះ តែវាគ្រាន់តែជាសមរភូមិតូចៗ។

សម្តេចបានបញ្ជាក់ថា បើសិនជាមានអ្វីកើតឡើងយើងនឹងត្រឡប់ទៅកាតព្វកិច្ចពាក់ម៉ាសវិញ ហើយយើងនឹងតាមដានការវិវត្តិបន្ទាប់ពីយើងបានដកកាតព្វកិច្ចពាក់ម៉ាសចេញ។

សម្តេចបានបន្ថែមថា ការដែលយើងលើកលែងកាតព្វកិច្ចពាក់ម៉ាសដើម្បីសម្រួលដល់ប្រជាពលរដ្ឋរបស់យើងដែលត្រូវចំណាយច្រើនដើម្បីទិញម៉ាស។

គួរឱ្យដឹងផងដែរថា ក្រោយផ្ទុះព្រឹត្តិការណ៍២៨ វិច្ឆិកា ឆ្នាំ២០២០ នៅថ្ងៃទី១៥ ខែធ្នូ ឆ្នាំ២០២០ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានចេញវីដេអូថ្លែងការណ៍ពិសេសមួយពីផ្ទះរបស់សម្ដេចដោយបានប្រកាសឱ្យពលរដ្ឋអនុវត្តវិធានការសុខាភិបាល៣ការពារ និង៣កុំឱ្យបានជាប់លាប់ ដែលក្នុងនោះការពាក់ម៉ាស់គឺជាអាទិភាពមួយនៃវិធានការនេះ។ គិតរហូតមកដល់ពេលនេះពលរដ្ឋកម្ពុជាត្រូវប្រើប្រាស់ម៉ាស់គឺមានរយៈពេលជាង១ឆ្នាំហើយ។

នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងក្នុងសារសំឡេងពិសេសដកកាតាព្វកិច្ចពាក់ម៉ាស់ចេញនៅព្រឹកនេះថា៖ «ខ្ញុំព្រះករុណាខ្ញុំសូមចូលរួមអបអរសាទរជាមួយប្រជាពលរដ្ឋដែលថ្ងៃនេះនឹងបានរំដោះខ្លួនចេញពីម៉ាស់ក៏ប៉ុន្ដែក៏នៅតែអំពាវនាវឱ្យរក្សាទុកម៉ាស់ជាប់ហ្នឹងខ្លួននៅពេលដែលចូលដល់កន្លែងដែលត្រូវចាំបាច់ពាក់ម៉ាស់ដូចបានកំណត់ដែលក្រសួងសុខាភិបាលនិងផ្នែកពាក់ព័ន្ធនឹងរៀបចំវិធានការបញ្ជាក់ទៅតាមក្រោយថាកន្លែងណាដែលពាក់ និងកន្លែងណាដែលមិនពាក់»៕

^{PHOTO: EAC NEWS}